三、山歌　民谣

历史上流传在东山的民谣及山歌多达上百首，在渡桥等地区亦多有流传。

1.山歌

（1）山歌好唱口难开

山歌好唱口难开，樱桃好吃树难栽，白米饭好吃田难种，鲜鱼汤好喝网难抬。

（2）一只山歌乱说多

一只山歌乱说多，油煎豆腐骨头多。太湖当中挑野菜，兔子笼里养老虎。瞎子张眼望苏州，大尖顶浪摸田螺。摸个田螺笆斗大，摆勒摇篮里厢骗外婆。

（3）一个姑娘三寸长

一个姑娘三寸长，勒浪茄子底下乘风凉。拨勒长脚蚂蚁找仔去，笑煞仔亲婆哭煞仔娘。

（4）高山头浪一群鹅

高山头浪一群鹅，一道拨勒贼伯伯偷仔去，单单剩只蹩脚鹅。阿哥话，烧烧吃仔吧；弟弟话，剩拨勒哥哥讨家婆。讨个家婆矮陀螺，八幅罗裙着地拖。上床要用蒲墩垫，下床又要丈夫驮。隔壁头娘娘倷覅取笑吾，格个叫，做仔夫妻没奈何！

（5）叫天子飞来节节高

叫天子飞来节节高，燕子飞来像剪刀。野鸡飞勒青草里，天鹅飞过太湖梢。蜻蜓飞出天要变，蝗虫飞临灾难到。蝴蝶飞到花丛里，布谷鸟飞来好种稻。

（6）一只梭

一只梭，两头尖，纺纱织布赚铜钱。小姑娘白相娘相伴，奴奴织布日夜忙。脚踏条，手把床，眼泪汪汪告诉郎。郎话倷弗要气，弗要恼，十年媳妇廿年婆，再歇廿年做太婆。

（7）大麦种在东横头

大麦种在东横头，小麦种在西横头。豌豆开花紫微微，蚕豆开花黑心头。小姑娘今朝陪母庵堂去，换衣打扮巧梳头。弥勒佛见仔眯眯笑，俏师姑懊恅剃光头。

（8）咿啊咿啊踏水车

咿啊咿啊踏水草，水车底浪一条蛇，游来游去寻阿摩。阿摩嘴里衔青草，青草开花胜牡丹。牡丹姐，要嫁人，石榴姐做媒人。大手巾，当门帘。小手巾，揩茶盘，揩得杯盏白似银。嫁个官人啥场化人？王家泾头王官人。

（9）媒人瞒人害煞人

嫁妆里厢一只红脚盆，淘米汏菜拨隆冬。公勒元堂算婚账，婆勒灶屋骂山门。新媳妇，气煞快，登勒房里泪汪汪怨媒人。媒人许吾三埭正屋四间厅，洛里晓得，歪歪倒倒一间牢棚两扇门。今后日脚哪能过，媒人瞒人害煞人。

（10）一把芝麻撒上天

一把芝麻撒上天，肚里山歌万万千。南京唱到北京去，回来还好唱三年。

（11）虫名十二山歌

正月梅花阵阵香，螳螂叫船游春场，蜻蜓相帮来摇橹，蚱蜢掮篙当头撑。

二月杏花处处开，蜜蜂开起茶馆来，梁山伯忙着冲开水，柜上坐着祝英台。

三月桃花朵朵红，来个茶客石胡蜂，接力黄谈起家常事，蝼蛄有病怕吹风。

四月蔷薇满墙开，蚕宝宝上山做茧哉，苍蝇睏觉明朝还，蚊子夜里上市来。

五月石榴红彤彤，花蝴蝶躲勒花当中，杨师太一叫活吓煞，吓得地鳖虫动也弗敢动。

六月荷花结成莲，织布娘登勒房里哭亲娘，唧蛉子细声来相劝，叫哥哥常蹲勒姐身边。

七月凤仙靠壁开，壁虎沿墙游过来，萤火虫提灯前头照，吓得田鸡跳起来。

八月金秋木樨香，蟋蟀夜夜偷婆娘，拨勒廊檐头蜘蛛来看见，结识个相好纺织娘。

九月重阳菊花黄，带兵打仗有蚂蟥，背包蜒蚰来督阵，千万蚂蚁尽阵亡。

十月芙蓉应小春，青壳田螺夜夜动坏脑筋，金钱乌龟拉皮条，香油虫出仔臭名声。

十一月里茶花开，红头百脚摆擂台，蛤蟆有点弗服气，灰骆驼卜笃跳上来。

十二月里蜡梅黄，跳蚤居然开典当，瘪虱强横做仔臭朝奉，老白虱上来当件破衣裳。

（12）亲家母，吾来告诉倷

亲家母，倷覅动气，请你坐好仔，吾来告诉倷：倷个囡吾来，叫俚淘淘米，水滩头浪弄烂泥。叫俚扫扫地，笤帚柄浪出把戏。叫俚烧烧火，火钳头浪爆白果。说说俚，火气比吾大。叫俚拎拎水，滴滴答答一屋里。叫俚买买油，油店里向搭讪头。叫俚买买线，走错仔店门买仔盐。叫俚小菜场买买菜，只管俚心里爱，拉勒篮里就是菜。亲家母，倷覅动气，倷得囡吾回转去，请倷好好仔教教俚。

2.民谣

（1）钪铃钪铃马来哉

钪铃钪铃马来哉，隔壁大姐转来哉。买点啥个菜，茭白炒虾，田鸡踏煞老蛙，老蛙告状，告拨和尚，和尚念经，念拨观音，观音拆屁，拆得一地。

（2）摇啊摇

摇啊摇，摇到外婆桥，买条鱼烧烧，头不熟，尾巴焦，吃仔呼啊呼啊快点摇。

摇呀摇，摇到外婆桥，外婆桥上瞧一瞧，瞧见外婆对吾笑，伸出手来拿吾抱，连连叫吾好宝宝，亦买团子亦买糕。拉吾小手屋里跑，叫吾歇歇力气坐坐好，忙得外婆弗得了。米来淘，菜来烧，清炖鲫鱼两头翘，咸肉菠菜线粉条。满碗白饭端正好，吃鱼吃肉自己挑，拿起调羹把汤浇。外婆眯眯笑，叫我吃饱肚皮仔快点摇。

（3）月亮

月亮出来白相相，走进倷家凉棚里，凉棚里面有只鸡。称称看，两斤半。烧烧看，两大碗。扯扯分分四小碗，公一碗，婆一碗，姑娘小叔合一碗。剩一碗，门角落里斋罗汉。罗汉弗吃荤，豆腐面筋囫囵吞，吞进一只死苍蝇。

（4）萤火虫

萤火虫，夜夜红，屁股浪向点灯笼。飞到东，飞到西，飞到草窠里向捉青虫。青虫捉弗着，倒拨勒触律刺痛脚。弗能动，只好蹲勒草窠里向望天空。

（5）野菜

阿大阿二挑野菜，阿三阿四做馄饨，阿五阿六吃馄饨，阿七阿八吃得弗肯剩，阿九阿十呒不吃，哭出乌拉只好舔舔空缸盆。

（6）排坐

排排坐，吃果果，倷一个，吾一个，大家吃得笑哈哈。

排排坐，吃果果，爹爹归来带糖果，猜猜看，啥人家爹爹带得多。

排排坐，吃果果，姆妈欢喜吾，吃好仔饭来吃水果。

（7）黄瓜棚

黄瓜棚，着地生，外公外婆请外甥。娘舅叫吾堂前坐，舅妈叫吾灶后蹲。一双筷，水淋淋，一碗菜，两三根。打碎仔外婆一只毛糙碗，三年不上外婆门。等到哥哥讨嫂嫂，大红帖子请上门。

黄瓜棚，着地生，雪白圆子请外甥。外甥吃仔两三个，舅妈面上气鼓鼓，娘舅勒屋里掼家生。外婆气得阿喂阿喂覅哪能样，同胞姐妹看娘面，千朵桃花一树生。外公翘起仔胡子弗管账，外婆盘勒里门角落里哭一场。

（8）公公

年公公，阿里来，脚踏莲花浪里来。带点啥么事来？带点铜鼓钎钹来。敲敲看，咚咚哐，钎钎哐。

（9）小弟弟

小弟弟，真有趣，一天到晚笑嘻嘻，明朝带倷街浪去，去看猢狲出把戏。要吃啥东西，伸出指头自家指。

（10）唱只山歌啥人听

唱只山歌啥人听，唱支山歌拨宝宝听。宝宝最聪明，听到山歌就安静。宝宝好记性，有只山歌最爱听，就是要唱那《西游记》里格只猢狲精。

（11）骑马康康

骑马骑马康康，一骑骑到松江。松江松江好地方。今到松江，还是头趟。

骑马骑马康康，一骑骑到太仓。太仓太仓，是个好地方，北靠长江，无限风光。

骑马骑马康康，一骑骑到吴江。吴江地方，有个平望，太湖边浪，蛮有名望。

（12）丫鹊尾巴长

丫鹊丫鹊尾巴长，愁柴愁米养姑娘。姑娘生来恶，将来嫁蚌壳。蚌壳空，嫁老翁。老翁死，嫁只猪。猪要杀，嫁秀才。秀才矮，嫁只蟹。蟹壳黄，嫁凤凰。凤凰飞，嫁只鸡。鸡要走，嫁只狗。狗要看门咬坏人，咬倷姑娘呒良心，让倷今生今世弗上门。

（13）一个小宝宝

一个小宝宝，小宝宝，弗要吵来弗要哭。要吃白蒲枣，阿哥望仔山浪跑，阿姐拿仔棒来敲。一敲敲仔三栲栳，青个多来红个少，吃得宝宝眯眯笑。

（14）摇摇摇，小宝宝

摇摇摇，小宝宝，摇到昆山水磨桥。水磨桥浪人弗少，挤落一个姑娘水里掉，救命救命拼命叫。摇船公公力气好，一把抓住姑娘腰，一拉拉上仔船艄。问声姑娘洛里人？百家湾里第四凹，门前有棵大榆树，门后有条小石桥，还有竹园萧勒萧，劈根竹头送拨倷，让倷摇船公公做好篙。